AccueilFAQRechercherglossaireLa charteConnexionS'enregistrer
Statistiques
Nous avons 388 membres enregistrés
L'utilisateur enregistré le plus récent est Dzulma

Nos membres ont posté un total de 31208 messages dans 2282 sujets
Le livre d’or

N'hésitez pas à signer notre livre d'or
Partenaires
Devenez partenaire de ce forum en nous envoyant votre bannière ou logo.

Fichier hébergé par Archive-Host.com

Fichier hébergé par Archive-Host.com

Fichier hébergé par Archive-Host.com

Fichier hébergé par Archive-Host.com

Fichier hébergé par Archive-Host.com

Fichier hébergé par Archive-Host.com

Fichier hébergé par Archive-Host.com

Fichier hébergé par Archive-Host.com

Fichier hébergé par Archive-Host.com

Fichier hébergé par Archive-Host.com

Fichier hébergé par Archive-Host.com

Fichier hébergé par Archive-Host.com

compteur
RADIOS

Fichier hébergé par Archive-Host.com


Partagez | 
 

 L'humanité elle a des bieaux restes

Voir le sujet précédent Voir le sujet suivant Aller en bas 
Aller à la page : 1, 2  Suivant
AuteurMessage
batisse

avatar

Sexe : Masculin
Date d'inscription : 22/12/2009
Messages : 4968
Localisation St Dié dins les Vosges

MessageSujet: L'humanité elle a des bieaux restes Ven 14 Oct 2011 - 22:38

Mes giins, i faut que je vous raconte eune séquo, même deux, tellemint que je ne peux nin garder cha pour mi tout seu.

Cheule semaine je roulos et avec min caméon in est allés vers le centre est, dont un tiot peu in Haute Savoie. Et vu que j'avos eune livraison à horaire imposé prévue pour jeudi midi du côté de Lyon, je m'a artrouvé bloqué à joquer pindint eune journée. Et ch'est là qu'i m'a arrivé eune drôle d'histoire.

Si que cha vous intéresse, i n'a qu'à continuer à lire. Sinon, vous pouvez passer à eune autre séquo. Vous faisez comme vous voulez!

Donc, pour les ceusses qui continuttent, je me chus artrouvé dins un tout tiot resto routier à proximité d'eune ville qui s'appelle Thones, à l'est d'Annecy. Mais là d'ùche qu'i a le resto, i a un resto et pis ch'est tout, à part eune espèce de carrière in face. Le resto i est plachi net d'ùche que des rayons du solel couchint is peuttent se faufiler au fond de l'vallée. De mi novimpe à mi février, i n'arrive même pus à se faufiler le solel, vu qu'i va à sin lit trop tôt...

Bref, je me pose là et m'première question au proprio ch'est de savoir si qu'i fait à minger au soir. I n'avot qu'un caméon chu sin parking: le mien!

I me dit "ouais ouais, i a nin de problème, i a Dédé qui va venir, pis peut-être incore un autre". I avot vu juste, vu qu'au soir in étot 3.

Mais là d'ùche que ch'est bieau ch'est que je li explique que je chus bloqué là pour un tiot momint. Je li dis que je chus là jusqu'au lindemain après-midi, à priori. Eh ben aussi sec le mec - que je n'avos jamais vu avint - i me dit "te vas te faire ch..er jusque demain. Si te veux, je te prête m'n'auto et te pourras aller te promener dans le secteur. Il y a de chouettes coins à vir. En passint par eune tiote route là-bas, t'es même vite fait au lac d'Annecy etc."

J'in étos chu min tchul. Comme ch'est nin min ginre d'imbêter les gins, je l'ai gintimint armercié et j'ai fait eune croix chu cheule possibilité de me pourmener avec s'n'auto. N'impêche que j'avos le sintimint d'être tché dins eune bonne since...

In a passé eune fin bonne soirée à rallonche avec les deux autres routiers, plus le patron et s'femme, qu'elle a décroché assez tôt vu qu'elle faijot l'ouverture au matin. Au matin, justemint, après eune bonne nuit sins rével qui sonne, j'ai pris eune bonne douche bin à l'aise, un bon tiot déjeuner, babellé avec l'patronne, fait des sudokus dins min caméon pour tuer le timps et à midi je chus artourné au resto.

Là le patron i me dit "alors, ch'est bétôt le départ?". J'i ai répondu que non, vu que je me trouvos tellemint bin ichi que j'avos décidé d'arpartir que le lindemain au matin.

Aussi sec i me dit: "cha te plairot de faire un tour in bateau?". J'ai dit ouais. Vinguette, le service i étot à peine fini qu'i me prenot avec sin 4x4, qu'in partot par l'tiote route qu'i m'avot dit pour aller cachi le batieau à sin garage, et in deux timps tros mouvemints, in étot au lac d'Annecy, in train de mettre le batieau à l'ieau. Un rude bestiau, avec un moteur de 140 cv, dont i se sert des fos pour faire du ski nautique. Jamais je n'étos monté dins un bazar parel. Ch'est impressionnint.

Et ch'est comme cha qu'in a passé facilemint 2 heures chu le lac d'Annecy, dont in a fait tout le tour, des fos vite, des fos duchemint tchand qu'i avot des séquos à expliquer - ou qu'i avot des péqueux.

J'ai pris eune paire de photos avec min téléphone, que ch'est tout cha que j'avos chu mi. J'avos aussi photographié l'auberge, mais apparemmint cha n'a nin marché (ch'est un nouvieau téléphone... et généralemint je ne me sers de min téléphone que pour téléphoner!)


Finalemint, comme prévu, je chus arparti le lindemain au matin, incore tout émerveillé qu'i existe des gins comme cha, le tchoeur chu la main.

Vinguette, au soir je me pose à Macon pour passer m'nuit, mais ch'coup-là dins un routier avec vraimint grammint de caméons chu sin parking. Je rintre dins le bistrot, à l'heure de l'apéro, donc avec bin du monte, et je deminte à l'serveuse si, vu qu'elle est du coin, elle pourrot me dire d'ùche qu'i a un distributeur de billets dins le secteur. "Houlà qu'elle me dit, si t'es à pids, cha fait loin quind même" et elle rajoute "mais si te veux, je te passe les clés de m'n'auto et t'y vas in auto!". Deux fos qu'in me fait le même cop l'même semaine! Incroyape!

Et attindez, ch'est nin tout... Là dessur i a un mec au comptoir qui me dit "allez viens, je t'y immène!". Et effectivemint, le mec i m'y a immené, avec s'n'auto, i a attindu que j'aiche mes doupes et i m'a ramené, alors que le retour ch'étot vraimint sin chemin.

Voilà! Des tiotes séquos comme cha, cha m'illumine m'vie. Ch'est pour cha que je voulos vous in faire profiter.

Rassurez-me: cha vous a déjà arrivé à vousautes aussi des séquos de ch'ginre?
Revenir en haut Aller en bas
Matante

avatar

Sexe : Féminin
Date d'inscription : 28/12/2009
Messages : 781
Localisation au Nord

MessageSujet: Re: L'humanité elle a des bieaux restes Sam 15 Oct 2011 - 7:32

A i bin réfléchir, des séquots comme cha, cha m'd'ai d"'jà arrivé mais dins l'aute sins : l'personne qui proposse sin aide : des personnes in panne su' l'bord de l'route que j'immène au garache, des pannes sèches, même une fos des doupes contre un chèque dins un camping isolé (i avot pas cor des distributeur ed billets à l'époque) etc.... I faut de tout pour faire un monte accueillant ! Allez bonne jornée à tertous, ch'au matin j'travalle ! Wink
Revenir en haut Aller en bas
pépéPéBé

avatar

Sexe : Masculin
Date d'inscription : 25/12/2009
Messages : 4646
Localisation Wimille 62126

MessageSujet: Re: L'humanité elle a des bieaux restes Sam 15 Oct 2011 - 8:04

Very Happy Ch ' est eune bielle histoire qu' té racontes la Batisse. Cha proufe qu'i a core des brafes gens d' sur la terre. Cha pourrot faire l' objet d' eune leçon d' morale à l' école....

.......

. Mi, un jour j' ai ram'né à s' maijon aveuc m' auto bin sur un guss qui étot in panne d' sur l' parking du super marché.......Ch' est tout jusse si qu'i m' a dit merci....i m' a pas invité à boire l' apéro à s' majon,i étot midi, et quand jé l' croise, ch' est un visin, i m' arconnot pas ! ! !

............

. Par conte j' étos crevé, pas mi, min peneu d' sur l' parking, i a un guss d' chez Norauto est vénu d' li même m' canger m' reule, i m' a dit "laichez me faire j' ai l' habitute" m' a argonflé mes peneux et tout cha gratuit'mint, i n' a rin voulu qu éj li donne........Ch'est pas grand cosse mais cha fait plaisir.

........

Revenir en haut Aller en bas
flersois

avatar

Sexe : Masculin
Date d'inscription : 27/11/2010
Messages : 1850
Localisation Belgique

MessageSujet: Re: L'humanité elle a des bieaux restes Sam 15 Oct 2011 - 8:47

Citation :
un routier avec vraimint grammint de caméons chu sin parking.

Et su ces parkings, t'as aussi des gentilles geurnoules qui vèn'tent taper sur t'porte et qui d"mindent si qu'elles peu'ftent t'aider...
Revenir en haut Aller en bas
batisse

avatar

Sexe : Masculin
Date d'inscription : 22/12/2009
Messages : 4968
Localisation St Dié dins les Vosges

MessageSujet: Re: L'humanité elle a des bieaux restes Sam 15 Oct 2011 - 9:09

Jamais vu!
Revenir en haut Aller en bas
la clo



Sexe : Féminin
Date d'inscription : 25/12/2009
Messages : 646
Localisation Brive la Gaillarde

MessageSujet: Re: L'humanité elle a des bieaux restes Sam 15 Oct 2011 - 9:16

ch'est inne belle histoire

l'ambiance des routiers sympas
Revenir en haut Aller en bas
tiote bellotte

avatar

Sexe : Féminin
Date d'inscription : 22/12/2009
Messages : 3111
Localisation Dins le beaujolais (69)

MessageSujet: Re: L'humanité elle a des bieaux restes Sam 15 Oct 2011 - 14:22

Ouais, mi j'cros à l'gintilesse des gins, pis ch'est surtout lié à l'manière dont in s'comporte nos-mêmes. Pis des fos d'l'humeur qu'in a c'jour là, in fonction des soucis, du traval, etc.. c'qu'in vit un jour n's'arprésinterot pet ête pas de l'même manière un aute jour...
In tous cas, quind in est pas aimape avec quelqu'un, in a peu d'chance que l'personne in face seuche aimape. (bon i a toudis des exceptions mais alles sont rares)

Nosautes, i a eune quinzaine d'années, in faisot nou premier voyache à l'étranger, in étot au Canada, quind in a rincontré des tiots soucis avec nou carte bancaire qu'i s'étot faite avaler par un distributeur (au trosième essai d'retrait in deux jours mais pas dins l'même ville), ch'étot intre les midis, bin sur l'banque étot freumée et nou car partot pou faire 400 kms... In étot foque au trosième jour d'nou voyache organisé avec des gins qu'in n'avot jamais rincontré avint et in avot pas cor bin fait connaissance et là spontanémint i a pusieurs personnes qui voulottent nous prêter d'l'argint liquide malgré qu'in n'avot pas emmené nou carnet d'chèques qui aurot permis d'les trinquiliser tout d'suite, "vous nous rembourserez quand on sera rentré en France en nous envoyant un chèque"... bin j'peux vos dire que je n'd'ai brait, d'jà qu'j'étos pas mal artournée par l'mésavinture.
Et l'gintillesse n's'est pas arrêtée là, l'guide et l'cauffeur ont tous les dux proposé qu'in attinde l'ouverture de l'banque et qu'in veuche c'qu'in pouvot faire malgré les horaires d'visites qui étottent prévues au programme... à l'ouverture ch'étot mal barré pou qu'in récupère nou carte, in pus in étot coté inglophone et in comperdot un mot d'sus tros de c'qu'in nos disot mais grâce à nou guide et pusieurs cops d'fils de l'banque (je n'sais pus d'ù), l'imployé à quind même ouvert l'distributeur pou nou rinde nou carte... in nos faisant bin comprinde que ch'étot pas l'procédure habituelle ! J'sus allée à part avec eune aute imployée pou artirer des sous sous sin contrôle -mais cha ch'est normal, in aurot pu avoir volé l'carte. Mais in a jamais su c'qu'i c'étot passé et pouquo depis deux jours, in faisant pourtint l'bon code in n'pouvot pas artirer des sous... alors qu'in pouvot payer avec sin problème in tapant l'code ???
j'peux vos dire que depis c'timps là, min homme et mi in a chacun eune carte...
In tous les cas cheule mésavinture a fait qu'in a tertous bin sympathisé dins l'car et que cha reste un d'mes meilleux souvenirs d'voyache organisé...

-+-+-+-+-+-+-+-+-+-+-+-+-+-+-+-+-+-+-+-+-+-+

l'principal c'est d'ête jone dins s'tiête
www.les-cartines.com
Revenir en haut Aller en bas
pépéPéBé

avatar

Sexe : Masculin
Date d'inscription : 25/12/2009
Messages : 4646
Localisation Wimille 62126

MessageSujet: Re: L'humanité elle a des bieaux restes Sam 15 Oct 2011 - 15:43

. In verrot cha dins un film in voudrot pas l' croire. Les "ginsbons" sont bénaches ch' est pour cha qu'is s' font avoir .

. Un jour in étot chez Aldi. I avot un PC ultra super plus à vite eune brique. 1.000.000 chintimes.... Un copain voulot l' acater mais i n' avot pas s'carte bleusse et sin carnet d' chèque d' sur li . J' ai payé l' PC pour li, et bin, vous dallez pas m' croire, el lend' main i m' les avot rindus aveuc ses remerciemints.
......
. Un aute jour, j' arrife chez un aute copain, (in 1998), i m' démante 5000 balles (anciens) à prèter. J' li fait un chèque, heureus' mint....i n' a jamais voulu m' les rinte.....la banque postale m' avot donné l' photocopie d' min chèque. Et bin vous dallez pas m' croire i m' a dit qu' chétot pas vrai, même in li métant l' photocopie du chèque sous sin nez....
. " A qui i c'est adressé ?,
. - A vous, c' est bien crédité à votre nom ! !
. - Bin nan, qu'est c' que j' aurais fait de c' t' argent la ?,
Et bin vous dallez pas m' croire i m' a jamais rimboursé les sous que j' li avot prétés ! ! ! Ch' étot pas un routier nan pus ! ! (J' ai fait eune crox d' sure, I est mort l' année passée)
........
. Un aute cop, in 2002, j' arvind à un aute "copain" m' voiture d' sure l' quelle j' vénos d' faire 1.800.000 Francs (anciens) d' réparations. "L' grand ju".
Et bin vous dallez pas m' croire i m' a jamais payé ! !
......
. Quand in est *** ch' est pour la vie....I a eune binte d' pirates, jamais les mêmes expéditeurs, qui m' invotent régulièr'mint des messages frauduleux SFR, pour avoir les coordonnées de m' carte bleusse.

. L' première fos j' ai failli m' faire avoir....J' mets leus adresses dins les indésirapes, j' in archos des autes aveuc l' même messache et les mêmes fautes d' orthographe invoyés par des autes expéditeurs. Is dotent in faire des photocopies....
...In brairot pour moinsse que cha, faut faire attintion à tout.
Sad Heureus'mint qu'i a core des routiers sympas ! ! ! !Very Happy
Revenir en haut Aller en bas
tiote bellotte

avatar

Sexe : Féminin
Date d'inscription : 22/12/2009
Messages : 3111
Localisation Dins le beaujolais (69)

MessageSujet: Re: L'humanité elle a des bieaux restes Sam 15 Oct 2011 - 15:56

J'viens d'arpinser à cha in rangeant des papis : I a queques ins j'vas querre min courrier dins l'bote aux lettes et j'vos eune inveloppe à min nom, j'oufe et d'dins quoque que j'vos ?? M'CARTE D'IDENTITE !!! que j'm'étos même pas aperçue que j'l'avos perdue ! in cachant j'me sus rappellée que l'derni cop que j'l'avos utilisée ch'étot deux jours auparavant.. alle avot du querre, pas dins l'magasin, j'ai demindé après, mais dehiors d'sus l'pavé et une brafe personne l'a treuvé et m'l'a rinvoyée...
J'ai jamais pu armercier l'personne, i avot pas d'nom d'espéditeur d'sus l'inveloppe !...

-+-+-+-+-+-+-+-+-+-+-+-+-+-+-+-+-+-+-+-+-+-+

l'principal c'est d'ête jone dins s'tiête
www.les-cartines.com
Revenir en haut Aller en bas
pépéPéBé

avatar

Sexe : Masculin
Date d'inscription : 25/12/2009
Messages : 4646
Localisation Wimille 62126

MessageSujet: Re: L'humanité elle a des bieaux restes Sam 15 Oct 2011 - 16:06

L' aute grand'père d' min tiot gourou min pétit fils Pierre perd ses papiers. N' les arteurvant pas, i fait tout arfaire et ch' est pas facile..cha déminte du timps

..... Ch' ti qu'i l' avot treuvé i étot honnête, il les a rindus mais pas tout d' suite, les formalités étotent déja faites.

. J' étos à Paris. In dallant aux gogs min porte feule quait par tierre. J' arviens par eul train et j' m' in aperchos inarrivant à m' maijon à Billy. Min mononque Henri, l' carrieux d' carbon a pris espécial'mint l' train donc Paris Billy puis Billy Paris pour mé l' rapporter ! ! !

. Very Happy Faut l' faire, brafe mononque.
Revenir en haut Aller en bas
batisse

avatar

Sexe : Masculin
Date d'inscription : 22/12/2009
Messages : 4968
Localisation St Dié dins les Vosges

MessageSujet: Re: L'humanité elle a des bieaux restes Sam 15 Oct 2011 - 18:09

Ch'est vrai qu'i a des braves gins. Même des commercints...

In étot assez jones mariés et dins un villache à côté i avot eune quincaillerie d'ùche que j'allos par plaiji, tellemint qu'i avot un bouvaque là-dedins, avec eune masse de séquos qui pindottent aux poutres, que des fos in ne savot même nin à quo que cha pouvot servir. I avot incore des pièges à leus ou bestioles ainsi, des grosses machoires avec un méga arsort. Pis des brosses à chiottes, pis des brocs que cha n'étot pus la mote depuis l'ieau courinte etc.

Déhiors i avot des métaux de toutes sections et longueurs. Incroyape.

In puq de quincaillerie, cha faijot artiques de ménache, électroménager etc. Si que te cachos eune vis espéciale et que ne l'trouvos nin là, ch'étot nin la peine d'aller cachi ailleurs.

Ch'étot tenu par deux guernoules.

Bref, un jour je vais là cachi je ne sais quo et pindint que je joquos, m'femme elle ravisot un robot de ménache kenwood. In réclame... Elle baffilot devint cha. Mi je trouvos que ch'étot quer pour cha que ch'étot.

Après qu'elle m'a vindu cha que j'étos aller acater, l'patronne à qui que j'avos eu à faire, qui n'avot nin ses ys dins ses poques, elle deminte à m'femme si que le robot kenwood i li plait. Autint deminder à un boteux si que cha li ferot plaiji de marcher drot!

Et la vlà qu'elle li explique que le modèle in réclame i est in réclame parce que les gins is préfèrtent d'habitute le modèle au-dessur, avec un grind bol in inox etc. Nousautes, fochémint, in dit "ben ouais, ch'est miux, mais ch'est pus quer..."

Et cheule femme-là, qu'elle ne nous connochot que comme cha eune fos de timps in timps, elle nous dit "et qui qu'ch'est qui vous parle de payer? Vous préférez le grind modèle madame? Eh ben je vous le prépare pour que vous partiez avec. Vous paierez tchand que vous pourrez!"

Je vous jure que ch'est vrai. Ch'étot i a plus de 30 ins et in peut dire que cha m'a marqué. Forchémint, au bout d'eune paire de mos cha a été payé.

Incroyape énon?
Revenir en haut Aller en bas
pépéPéBé

avatar

Sexe : Masculin
Date d'inscription : 25/12/2009
Messages : 4646
Localisation Wimille 62126

MessageSujet: Re: L'humanité elle a des bieaux restes Sam 15 Oct 2011 - 19:08

Min mononque carrieux d' carbon ch' étot pas un commerçant. Ch' est ch'ti qui amnot l' carbon aux maijons des ovriers aveuc un tombreau et un gros bidet. In 1959 i a quitté les mines pour daller travailler à la SEV Marschall dins l' 18 ème à Paris.
Revenir en haut Aller en bas
flersois

avatar

Sexe : Masculin
Date d'inscription : 27/11/2010
Messages : 1850
Localisation Belgique

MessageSujet: Re: L'humanité elle a des bieaux restes Sam 15 Oct 2011 - 21:50

J'étos parti à la mer à Knokke le Zoute, et comme i'avot gramin d'monte j'avos laissé m'n'auto sur un parking assez loin de la mer, au momint de r'tourner à m'n'auto, j'ai vu des gins et j'leur ai d'mindé si ils connaissaient le meilleur chemin pour aller à ce parking, ils m'ont proposé de m'y emmener, j'ai pu faire les tros kilomètes dins leur belle grosse...BMW..
Revenir en haut Aller en bas
batisse

avatar

Sexe : Masculin
Date d'inscription : 22/12/2009
Messages : 4968
Localisation St Dié dins les Vosges

MessageSujet: Re: L'humanité elle a des bieaux restes Sam 15 Oct 2011 - 22:23

T'es t'un rute veinard tisaute...
Revenir en haut Aller en bas
flersois

avatar

Sexe : Masculin
Date d'inscription : 27/11/2010
Messages : 1850
Localisation Belgique

MessageSujet: Re: L'humanité elle a des bieaux restes Sam 15 Oct 2011 - 22:25

batisse a écrit:
T'es t'un rute veinard tisaute...

Ch'éto un 59....






Batisse, j'ai vu pour l'première fos in vrai ène Bugatti Veyron là-bas...


Dernière édition par flersois le Sam 15 Oct 2011 - 22:42, édité 1 fois
Revenir en haut Aller en bas
batisse

avatar

Sexe : Masculin
Date d'inscription : 22/12/2009
Messages : 4968
Localisation St Dié dins les Vosges

MessageSujet: Re: L'humanité elle a des bieaux restes Sam 15 Oct 2011 - 22:42

Ah... tout s'explique!
Revenir en haut Aller en bas
pépéPéBé

avatar

Sexe : Masculin
Date d'inscription : 25/12/2009
Messages : 4646
Localisation Wimille 62126

MessageSujet: Re: L'humanité elle a des bieaux restes Dim 16 Oct 2011 - 11:59

. Flersois, Ch' est pour avoir du monte pour pousser l' carrette si qu' alle quéot in panne ! ! ! Cha pèsse lour eune bagnole comme cha....
Revenir en haut Aller en bas
batisse

avatar

Sexe : Masculin
Date d'inscription : 22/12/2009
Messages : 4968
Localisation St Dié dins les Vosges

MessageSujet: Re: L'humanité elle a des bieaux restes Dim 16 Oct 2011 - 12:32

flersois a écrit:
Batisse, j'ai vu pour l'première fos in vrai ène Bugatti Veyron là-bas...

Et pourquo que te dis cha aussi tout bas? I n'a rin d'honteux à cha.

Des Veyron in in vot de timps in timps dins le secteur de Strasbourg, là d'ùche qu'elles sont construites.

Pour dire min tiot tchoeur comme i est, cha me laisse plutôt indifférint des autos comme cha. 1000 chevaux pour rouler où? Et mettre plus d'un million de roros pour le modèle de base, je trouve cha indécint et matuvu.

Mais infin bon, in dirot qu'i a un marché pour cha. Ch'est nin la crise pour tertous.
Revenir en haut Aller en bas
pépéPéBé

avatar

Sexe : Masculin
Date d'inscription : 25/12/2009
Messages : 4646
Localisation Wimille 62126

MessageSujet: Re: L'humanité elle a des bieaux restes Lun 17 Oct 2011 - 9:16

. Ch' est pour épater tout l' coron.

. In 1970 quand que j' pasos dins les corons aveuc m'magnifique Ariane verte qui in jechtot un jus, m' belle mère quand qu' elle étot dins l' carrette, alle dijot bonjour à tout l' monte ! ! !
Revenir en haut Aller en bas
batisse

avatar

Sexe : Masculin
Date d'inscription : 22/12/2009
Messages : 4968
Localisation St Dié dins les Vosges

MessageSujet: Re: L'humanité elle a des bieaux restes Lun 17 Oct 2011 - 9:38

L'reine d'Ingletierre et l'pape is font parel! Pourtint is n'ont même nin eune ariane.

L'ariane, ch'étot le gros bazar simca qui étot l'tiote soeur de l'chambord, ch'est cha? Eune auto sous motorisée à cause - déjà - d'eune crise du pétrole. J'ai bon?
Revenir en haut Aller en bas
flersois

avatar

Sexe : Masculin
Date d'inscription : 27/11/2010
Messages : 1850
Localisation Belgique

MessageSujet: Re: L'humanité elle a des bieaux restes Lun 17 Oct 2011 - 11:02

batisse a écrit:
L'reine d'Ingletierre et l'pape is font parel! Pourtint is n'ont même nin eune ariane.

L'ariane, ch'étot le gros bazar simca qui étot l'tiote soeur de l'chambord, ch'est cha? Eune auto sous motorisée à cause - déjà - d'eune crise du pétrole. J'ai bon?

Non, t'as nin bon, l'crise du pétrole c'est en 74...mais sous-motorisée, c'est juste, il vallot mieux sur c'genre de savonnette... ch'étot bin pratique pour faire demi-tour, un coup d'frein à main et un tiot coup d'volant....
Revenir en haut Aller en bas
pépéPéBé

avatar

Sexe : Masculin
Date d'inscription : 25/12/2009
Messages : 4646
Localisation Wimille 62126

MessageSujet: Re: L'humanité elle a des bieaux restes Lun 17 Oct 2011 - 17:06

Exact. Si mes souvenirs sont exacts

.En France il y avait la Versailles avec un moteur V6 latéral et un moteur de 13 cv.

Après l' cop à Nasser qui a bloqué l' canal de Suez in foutant l' bazar, l' essence étant dévnue rare et chère (ach't' heure alle est bon marché ?) Ch' est Simca qui fabriquot l' Versailles a rimplaché le moteur par un 7 Cv. puis par un aute moteur un tiot peu plus performant le Rusch Super toudis 7 cv.

Avantache, té pouvos monter à 6 la d' dins et mète un buffet d' cuisine dins l' coffe... In infinçant l' pédale d' accélérateur dins l' plancher t' arrivos quand même à friser les 100 Kms à l' heure dins les côtes, quand cha deschindot un tiot peu.

Pour l' époque, alle étot superpe....In étot contints... Very Happy Cha cangeot de l' Dauphine....qui ténot pas la route et qui dallot pas pus vite......

. T' as vu l' carrette, l' Mercédes dins les "violons dingues" ? j' sais pas à qui ch' est, sur'mint pas à un pouilleux, à moinsse qu'i l' arot volée ! ! !

Very Happy

.
Revenir en haut Aller en bas
Invité
Invité



MessageSujet: Re: L'humanité elle a des bieaux restes Lun 17 Oct 2011 - 17:49

et on dit qui à paq ed riches dins nord pasde calais
Revenir en haut Aller en bas
flersois

avatar

Sexe : Masculin
Date d'inscription : 27/11/2010
Messages : 1850
Localisation Belgique

MessageSujet: Re: L'humanité elle a des bieaux restes Lun 17 Oct 2011 - 17:53

Citation :

. T' as vu l' carrette, l' Mercédes dins les "violons dingues" ? j' sais pas à qui ch' est, sur'mint pas à un pouilleux, à moinsse qu'i l' arot volée ! ! !

Si c'est ène d'origine, cha dot coûter ène fortune mais i parait qu'in fait des répliques.
J'ai eu ène Dauphine aussi, ène bleue Gordini....
Revenir en haut Aller en bas
pépéPéBé

avatar

Sexe : Masculin
Date d'inscription : 25/12/2009
Messages : 4646
Localisation Wimille 62126

MessageSujet: Re: L'humanité elle a des bieaux restes Lun 17 Oct 2011 - 18:20

Si j' l' arvos j' va d' mander des rinseignemints à ch' propriètaire. I a des collectionneurs, partant d' presque rin i armonte eune carrette qu'in dirot eune neufe.
Revenir en haut Aller en bas
Contenu sponsorisé




MessageSujet: Re: L'humanité elle a des bieaux restes

Revenir en haut Aller en bas
 

L'humanité elle a des bieaux restes

Voir le sujet précédent Voir le sujet suivant Revenir en haut 
Page 1 sur 2Aller à la page : 1, 2  Suivant

Permission de ce forum:Vous ne pouvez pas répondre aux sujets dans ce forum
 :: Pour bien commencer la journée :: Ch'est histoire d'dire-