l'colombe et l'fourmisse

"Donne chu qu't'as. J'té donn'rai chu qu'j'ai !"
In nou temps, ch'est comme cha qu'in vit
In fait des écanges intr'amis :
Faut bin s'intr'aider... pas vrai ?
J'aime bin ch'l'histoire d'La Fontaine,
L'colombe et l'fourmi.
Chelle-chi, all' s'étot noïée dins l'fontaine
Dù qu'ch'est qu'el' colombe, qu'in li dit,
Qu'all' buvot... All' veïot l'pauv' tiote bête
Qu'all' allot périr,
Qu'all' faijot d'z'efforts pou n'point mourir.
L'colombe, qu'all' l'arvette,
All' i fait charité.
All' i fait d'un pont d'herbe comme eun' jetée
Par d'ù que l'fourmisse s'agrippe et qu'all' s'déquinpette...
V'la un bonhomme avec s'n'arbalète
Qui vot l'colombe... I s'dit "all' s'ra pou min dîner !"
L'fourmisse all' i pique sin talon.
Pindint qu'i fait un bond,
L'colombe s'a involée.

Té vos qu'chés bêtes is sav'tent s'aider !
Pouquo qu'nous z'autres qu'in érot moins d'bonté ?

MARIE-ANGE MERLIER

All's'déquinpette : elle se sort d'affaire, elle se dégage